Auszug aus dem Physiologus (11. Jahrhundert)
de leone.
Hier begin ih einna reda umbe diu tier, uuaz siu gêslîho bezêhinen. Leo bezêhinet unserin trohtin turih sîne sterihchi, unde beidiu uuiret er ofto an hêligero gescrifte genamit. Tannan sagit Jacob, tô er namæta sînen sun Judam, er choat: Judas mîn sun ist uuelf des leuin. Ter leo hebit triu dinc an imo, ti dir unserin trotinin bezeichenint. Ein ist daz: sôser gât in demo uualde, un er de iagere gestincit, sô vertîligot er daz spor mit sinemo zagele ze diu daz sien ni ne vinden. So teta unser trotin, tô er an der uuerilte mit menischon uuaz. ze diu daz ter fient nihet verstûnde, daz er gotes sun uuâre. Tenne so der leo slâfet, sô uuachent sînu ougen. An diu daz siu offen sint, dâranna bezeichenit er abir unserin trotin, alser selbo quad an demo bûhche cantica canticorum: Ego dormio et cor meum vigilat. Daz er rasta an demo menisgemo lîchamin un er uuahcheta an der gotheite. Sô diu leuin birit, sô ist daz leuinchelîn tôt, sô beuuard su iz unzin an den dritten tag. Tene sô chumit der fater unde blâset ez ana, so uuirdit ez erchihit. Sô uuahta der alemahtigo fater sînen einbornin sun vone demo tôde an deme triten tage.